Umr Jalvon Mein Basar Ho Ye Zaroori To Nahin

Khamosh Dehlvi…

Umr jalvon mein basar ho ye zaroori to nahin
Har shab-e-gham ki sahar ho ye zaroori to nahin

Chashm-e-saaqi se piyo yaa lab-e-saagar se piyo
Bekhudi aathon pahar ho ye zaroori to nahin

Neend to dard ke bistar pe bhi aa sakti hai
Unki aagosh mein sar ho ye zaroori to nahin

Shekh karta to hai masjid mein khuda ko sajde
Uske sajdon mein asar ho ye zaroori to nahin

Sab ki nazaron mein ho saaqi ye zaroori hai magar
Sab pe saaki ki nazar ho ye zaroori to nahin