hum padh rahe the khvaab ke purzon ko jod ke

Shahryar ...

hum padh rahe the khvaab ke purzon ko jod ke
aandhi ne ye tilism bhi rakh dalaa tod ke

aagaaz kyon kiya tha safar un khvaabon ka
pachhtaa rahe ho sabz zaminon ko chhod ke

ik buund zahar ke liye phailaa rahe ho haath
dekho kabhi khud apne badan ko nichod ke

kuch bhi nahin jo khvaab ki tarah dikhaai de
koi nahin jo hum ko jagaaye jhinjhod ke

in paaniyon se koi salaamat nahin gayaa
hai vaqt ab bhi kashtiyaan le jaao mod ke