Phir Iss Duniyaa Se Ummeed-E-Vafaa Hai

Naresh Kumar Shad…

Phir iss duniya se ummeed-e-vafaa hai 
tujhe ai zindagi kya ho gayaa hai

Badi zaalim nihaayat bevafaa hai 
ye duniya phir bhi kitni khush-numaa hai

Har ik apne hi gham mein mubtilaa hai 
kissi ke dard se kaun aashnaa hai

Mere naqqaad meri shaayari to 
mere tuute huye dil ki sadaa hai

Kahaan hoon "shad" main to shaad saa hoon 
vo shaad-e-khush-navaa to mar chukaa hai