Thursday, May 9, 2013

Ye Jo Divaane Se Do Chaar Nazar Aate Hain

Sagar Siddiqui…

Ye jo divaane se do chaar nazar aate hain
In mein kuchch saahib-e-asraar nazar aate hain

Teri mehfil ka bharam rakhte hain so jaate hain
Varna ye log to bedaar nazar aate hain

Duur tak koi sitaara hai na koi juganu
Marg-e-ummeed ke aasaar nazar aate hain

Mere daaman mein sharaaron ke siva kuchch bhi nahin
Aap phuulon ke kharidaar nazar aate hain

Kal jise chhuu nahin sakti thi farishton ki nazar
Aaj vo raunaq-e-baazaar nazar aate hain

Hashr mein kaun gavaahi meri dega 'sagar'
Sab tumhaare hi tarafdaar nazar aate hain

0 Opinions:

Archives