Meri vafaayen yaad karoge

Taseer ...

Meri vafaayen yaad karoge
ro-oge, fariyaad karoge

mujh ko to barbaad kiya hai
aur kise barbaad karoge

hum bhi hansenge tum par ik din
tum bhi kabhi fariyaad karoge

mahfil ki mahfil hai gam-gin
kis-kis kaa dil shaad karoge

dushman tak ko bhuul gaye ho
mujh ko tum kya yaad karoge

jaakar bhi naashaad kiya tha
aakar bhi naashaad karoge

chhodo bhi 'taseer' ki baaten
kab tak us ko yaad karoge