Sunday, January 16, 2011

Hum Par Tumhaari Chaah Ka Ilzaam Hi To Hai

Faiz Ahmed Faiz…

Hum par tumhaari chaah ka ilzaam hi to hai 
dushnaam to nahin hai ye ikaraam hi to hai

Karte hain jiss pe taa'n, koi jurm to nahin 
shauq-e-fuzuul-o-ulfat-e-nakaam hi to hai

Dil muddai ke harf-e-malaamat se shaad hai 
ae jaan-e-jaan ye harf tera naam hi to hai

Dil naa-ummid to nahin, na-kaam hi to hai 
lambi hai gham ki shaam, magar shaam hi to hai

Dast-e-falak mein, gardish-e-taqdeer to nahin 
dast-e-falak mein, gardish-e-ayyaam hi to hai

Aakhir to ek roz karegi nazar wafaa 
wo yaar-e-khush-khasaal sar-e-baam hi to hai

Bheegi hai raat 'faiz' ghazal ibtidaa karo 
waqt-e-sarod dard ka hangaam hi to hai

0 Opinions:

Archives