Chupke Chupke Raat Din

Hasrat Mohani ...

chupke chupke raat din aansuu bahaana yaad hai
hum ko ab tak aashiqi ka vo zamaanaa yaad hai

baahazaaraan iztiraab-o-sad-hazaaraan ishtiyaaq
tujhse vo pahle pahal dil ka lagaanaa yaad hai

tujhse milte hi vo bebaak ho jaanaa mera
aur tera daaton mein vo ungli dabaanaa yaad hai

kheench lenaa vo mera parde ka kona daffaatan
aur dupatte se tera vo muunh chhupaanaa yaad hai

jaan kar sotaa tujhe vo qasa-e-paabosii mera
aur tera thukaraa ke sar vo muskuraanaa yaad hai

tujh ko jab tanhaa kabhi paanaa to azraahe-lihaaz
haal-e-dil baaton hi baaton mein jataanaa yaad hai

jab sivaa mere tumhaaraa koi deevaanaa na thaa
sach kaho kya tum ko bhi vo kaarkhaanaa yaad hai

gair ki nazron se bachkar sab ki marzi ke khilaaf
vo tera chori chhipe raaton ko aanaa yaad hai

aa gaya gar vasl ki shab bhi kahin zikr-e-firaaq
vo tera ro ro ke mujhko bhi rulaanaa yaad hai

do-pahar ki dhuup mein mere bulaane ke liye
vo tera kothe pe nange paaon aanaa yaad hai

dekhna mujhko jo bargashtaa to sau sau naaz se
jab manaa lenaa to phir khud ruuth jaanaa yaad hai

chori chori hum se tum aa kar mile the jis jagah
muddaten guzarin par ab tak wo thikaanaa yaad hai

berukhi ke saath sunaanaa dard-e-dil ki dastaan
aur tera hathon mein vo kangan ghumaanaa yaad hai

vaqt-e-rukhsat alvidaa kaa lafz kahne ke liye
vo tere sukhe labon ka thar-tharaanaa yaad hai

baavajuud-e-iddaa-e-ittaqaa 'hasrat' mujhe
aaj tak ahad-e-havas ka ye fasaanaa yaad hai